தேசிய கலை இலக்கிய விழா 2011 பரிசும் சான்றிதழும் வழங்கும் விழா

கோறளைப்பற்றுப் பிரதேச செயலகத்தினால் வருடந்தோறும் நடாத்தப்பட்டு வருகின்ற, பிரதேச செயலக மட்டத்திலான தேசிய கலை இலக்கிய விழா 2011இற்கான பரிசளிப்பும் சான்றிதழ் வழங்கும் வைபவமும் 25.11.2011, வெள்ளிக்கிழமை வாழைச்சேனை லயன்ஸ் கழக மண்டபத்தில் பிரதேச செயலாளர் எஸ்.கிரிதரன் தலைமையில் நடைபெற்றது.

  பாடசாலை மட்டம், வெளிமட்டம் என இருநிலைகளில் நடாத்தப்பட்ட பாட்டு நயத்தல், சிறுகதை, கட்டுரை, கையெழுத்துப் போட்டி, கவிதை பாடும் போட்டி, விமர்சனக் கட்டுரை, பாடலாக்கம் போன்ற போட்டிகளில் பங்குபற்றி முதல் மூன்று இடங்களையும் பெற்றவர்களுக்கு பரிசில்களும், சான்றிதழும் வழங்கப்பட்டன.

  கல்குடா வலயக்கல்விப் பணிப்பாளர் திருமதி. சுபா சக்கரவர்த்தி இந்நிகழ்வில் பிரதம அதிதியாக கலந்துகொண்டு சிறப்பித்தார். இதில், வெளிநிலைப் போட்டிகளில் வெற்றி பெற்ற கறுவாக்கேணி முத்துமாதவன் (கவிதை முதலாம் இடம், சிறுகதை மூன்றாம் இடம், பாடலாக்கம் மூன்றாம் இடம்), வாழைச்சேனை எ.ஜெயரஞ்சித் (பாடலாக்கம் முதலாம் இடம், கவிதை இரண்டாம் இடம்), வாழைச்சேனை எஸ்.ஏ.ஸ்ரீதர் (சிறுகதை முதலாம் இடம், கட்டுரை இரண்டாம் இடம், கவிதை மூன்றாம் இடம்), வாழைச்சேனை திருமதி.ஸோபா ஜெயரஞ்சித் (விமர்சனக் கட்டுரை முதலாம் இடம், கட்டுரை முதலாம் இடம்), தாழை செல்வநாயகம் (சிறுகதை முதலாம் இடம், விமர்சனக் கட்டுரை மூன்றாம் இடம்), வாழைச்சேனை தே.சத்தியகலா (சிறுகதை இரண்டாம் இடம்), வாழைச்சேனை திருமதி.அருந்ததி சுந்தரமூர்த்தி (பாடலாக்கம் இரண்டாம் இடம்), பேத்தாழை திருமதி.செவ்வந்தி சதீஸ்வரன் (விமர்சனக் கட்டுரை இரண்டாம் இடம்), வாழைச்சேனை எஸ்.ஜெயசேகர் (கட்டுரை மூன்றாம் இடம்) ஆகியோருக்கு சான்றிதழ்களும், பரிசுகளும் வழங்கப்பட்டன.